Bigg Boss 3 Telugu: అలీ రెజా ఔట్.. హౌస్‌మేట్స్‌కి బిగ్ షాక్.. ఏడ్వనివారు లేరు
వరల్డ్స్ బిగ్గెస్ట్ రియాలిటీ షోగా చెప్పుకుంటోన్న బిగ్ బాస్ తెలుగులోనూ మంచి ప్రేక్షకాదరణను పొందుతోంది. ప్రస్తుతం మూడో సీజన్ సాఫీగా సాగుతోంది. ఈ క్రమంలో ఇప్పుడు బిగ్ బాస్ అదిరిపోయే షాక్ ఇచ్చారు.
బిగ్ బాస్ రియాలిటీ షో.. ఇదో రకమైన ఎంటర్‌టైన్మెంట్. వాళ్లు కొట్టుకుంటుంటే అది చూసి మనం బయట ఎంజాయ్ చేస్తుంటాం. ఒకరి గురించి ఒకరు వేరే వాళ్ల దగ్గర చాడీలు చెబుతుంటే ఇదేం పని అని బయటి నుంచి మనం తిడుతూ ఉంటాం. మనకు అస్సలు సంబంధంలేని వ్యక్తుల గురించి టీవీలో చూసి మరీ అభిప్రాయాలు చెప్పేస్తూ ఉంటాం. మనమే ఆ ఇంటిలో ఉన్నట్లు ఫీలవుతూ ఉంటాం. అంతలా ఈ షో ప్రేక్షకులపై ప్రభావం చూపిస్తుంది. అందుకే, అన్ని భాషల్లోనూ ఈ షో ఎంతో పాపులారిటీ సంపాదించింది.
బిగ్‌బాస్‌ హౌస్‌లో ఎప్పుడు ఏం జరుగుతుందో చెప్పలేం. ఇంటి సభ్యుల్లో ఎవరు ఎలిమినేట్ అవుతారో ఊహించలేం. శని, ఆదివారాలు వచ్చేసరికి ఈవారం ఎలిమినేట్ అయ్యేది ఎవరు అని చాలా ఆసక్తిగా చూస్తాం. ఎలిమినేట్ అయ్యింది ఎవరో తెలిశాక కొంత మంది ‘అయ్యో’ అంటారు.. మరికొంత మంది ‘అనుకున్నానులే’ అని లైట్ తీసుకుంటాం. కానీ, ఈ వారం అందరినీ ఆశ్చర్యానికి గురిచేసే ఎలిమినేషన్ బిగ్ బాస్ షోలో జరిగింది. ఈ సీజన్‌కు బలమైన కంటెస్టెంట్‌గా చెప్పుకుంటోన్న అలీ రెజా ఇంటి నుంచి బయటికి వచ్చేశారు.
ఏడోవారం ఎలిమినేషన్‌కు ఐదుగురు నామినేట్ అయిన సంగతి తెలిసిందే. రాహుల్ సిప్లిగంజ్, అలీ రెజా, శ్రీముఖి, మహేష్ విట్టా, రవికృష్ణ నామినేట్ అయ్యారు. అలీ నామినేట్ అవడం ఈ సీజన్‌లో ఇదే తొలిసారి. అయితే, వీరిలో రాహుల్ సేఫ్ అయినట్టు శనివారం నాగార్జున ప్రకటించారు. ఇక మిగిలింది అలీ రెజా, శ్రీముఖి, మహేష్, రవి. వీళ్లు నలుగురిలో అలీ రెజా ఎలిమినేట్ అవుతాడని హౌస్‌మేట్స్ కానీ, ప్రేక్షకులు కానీ ఊహించలేదు. కానీ, అదే జరిగింది. ప్రత్యేకమైన 50వ ఎపిసోడ్ రోజు బిగ్ బాస్ నమ్మలేని షాక్ ఇచ్చారు. కానీ, నమ్మితీరాలి.
అయితే, తొలిసారి నామినేట్ అయిన కంటెస్టెంట్ ఎలిమినేట్ కావడం ఇది తొలిసారి కాదు. ఇదే షోలో రోహిణి, అషు రెడ్డి, తమన్నా తొలిసారి నామినేట్ అయ్యి ఇంటి నుంచి వెళ్లిపోయారు. అలాగే, తొలి సీజన్‌లో ప్రిన్స్ తొలిసారి నామినేట్ అయ్యి ఎలిమినేట్ అయిపోయాడు.